سبعات زي بتاعت أسماء

سبعات زي بتاعت أسماء

http://365-posts-308.blogspot.com/2013/09/blog-post_28.html 

سبع حاجات نفسي أعملها:

1-            أسافر7بلاد:"روسيا,أمريكا,إنجلترا,فرنسا,ألمانيا,اليابان,نيوزيلندا"

2-أكتب برنامج إذاعي لإذاعة البرنامج الثقافي جزء من الرغبة وفاء لدين للمدرسة العظيمة المهدورة دي,وجزء تاني محاولة لاستعادة أمجاد الماضي,أمجاد الستينات...وما أدراكم ما الستينات!

3-أبدأ في عملي الملحمي العظيم المنتظر عن تاريخ مدينة دمنهور في 100سنة من أول 1911لحد 2011,من غير ما أقول لنفسي كل ما أفكر في الموضوع ده:"فكك ياله من الهجص ده,كان غيرك أشطر,انت هاتعملي فيها تولستوي عالمسا"

4-أتقن لغات عشان أقرا الكتب بلغتها الأصلية قدر المستطاع,وأبطل استعين بمترجم,يعني مثلاً نفسي في اليوم اللي اقرا فيه لعم أنطون تشيكوف أنا وهو لوحدنا,من غير ما يكون أبو بكر يوسف صديق العظيم نجيب سرور تالتنا,أو اقرا رواية جسر علي نهر درينا زي ما كتبها أندرتش.

5-أكتب في يوم عن كل الأفلام اللي اتأثرت بيها,من أول المواطن كين لحد inceptionمع الاحتفاظ بمكان الصدارة للسينما الغير الأمريكية,والسينما الأوروبية بسحرها الفني البعيد عن الإبهار,والقريب من القلب والمشاعر.

6-أقول كل اللي في قلبي من غير ما أخاف.

7-أعيش وجودي وذاتيتي من غير ما أخلي الغير يأثر فيا,أو يحتل دماغي اللي بحاول أحصنها ضد أي أحداث خارجية لأنها ممكن تتحول لحمام عمومي,لو قعدت أفكر في اللي حصل واللي وصل,واللي اتقال واللي اتعاد.

سبع حاجات أقدر أعملها:

1-أنام بالساعات الطويلة,وممكن بالأيام,وأسهر بالساعات الطويلة وبالأيام برضه.

2-أقعد في ركن لعب الأطفال في النادي,وأتفرج عليهم وهم بيلعبوا والعب بقلبي معاهم طول اليوم,من غير أكل ولا شرب,غير بس ضحكة طفل والسعادة مالية المكان وما أقدرش أمنع دمعتين بداريهم بسرعة.

3-أسكت وما اتكلمش طول الوقت.

4-أقرا في أي مكان وفي أي وقت.

5-أقعد جنب الشباك في المواصلات وأنا مسافر اسكندرية,وأروح بخيالي لعوالم ملهاش حدود,وأبقي متغاظ من السواق لما يوصل مدخل سموحة.

6-أحس بكل المشاعر,وتتغلغل فيا,حتي لو كانت مش خاصة بيا....وساعات خصوصاً لو كانت مش خاصة بيا,....رغم أن مسح دمعة قدام حد في مجتمعنا,بيسبب شعور مخزي.

7-إني أآمن بالحقيقة بسبب انفعالي بيها وإحساسي الباطني وحماسي للحاجة اللي باتخيلها أنها حقيقي,وأنكر كل الأوهام الجماعية حتي لو كانت البشرية كلها مصدقها,زي مثلاً وهم التعليم الأكاديمي العبيط اللي أضر البشر وماأفدهاش.

سبع حاجات ما أقدرش أعملها:

1-أبطل سرحان.

2-أبطل تفكير.

3-أبطل كتابة

4-أبطل أقرا

5-أبطل أسمع أم كلثوم

6-أبطل أروح القهوة.

7-أبطل جلد ذاتي بكلام جارح لو مالقيتش حد يجلدها.

سبع حاجات موجودة في كلامي..ده لو اتكلمت:

1-معلش هانعمل إيه.

2-أنت حقيقي؟!ولا كده كده؟!

3-كان غيرك أشطر يا حاج

4-إنت كده جبت الزتونة يعني؟!..برافو عليك

5-أنا محتاج علاقة عاطفية,وأنت محتاج علاقة عاطفية,كلنا محتاجين علاقات عاطفية.

6-كل مشكلات البلد أصلها مشكلة واحدة أنه مفيش تعليم,فيه حيونة وقلة أدب.

7-يا راااااااجل!!

يمكن واحد بس من الشخصيات اللي عايشة جوايا هو اللي اتكلم,أكيد الواد "اللي كل شوية يقولي عايزك تكتب بالعامية حلوة,وحياة ستي بهانة العامية حلوة بس أنت اللي فقر",وأكيد فيه حاجات لا تحصي بتظهر وبتختفي كل يوم في حياتي,وأكيد إني باشكر أسماء خليفة علي إنها ادتني الفرصة دي عشان أدور جوا ذاتي أهراماتي,وإنما اللي مش أكيد إنه يكون ده فعلاً جزء من شخصيتي...بصراحة أنا كمحمود اندهشت!!!