وليه لما أحبها وتحبني
يطلع ما بينا شيطان؟!
ونبقي تلاتة
أنا وهي والشيطان
شيطان حقيقي
حتي لو كنت ملحد
الشيطان مش أسطورة
الشيطان إحنا بس بصورة غير الصورة
الشكل مش قرنين وديل
لأن الشيطان مالهوش شكل
الشيطان زي الفيسبوك
حط لبروفايله أي صورة
يعني أنا وهي مش سوا
هي بعيدة وأنا كمان
وباقول قصيدة سخيفة عن بعدها وعن الشيطان
وشكلها هتطول
وعمرنا يا حلوة قصير
مكانش ناقصه وجود شيطان!
حزة البنطلون عليكي
وشعرك السايح
ونهدك المكشوف هم اللي نادوا الشيطان؟
ولا حقدي علي صاحبي
يوم ما قال:"ما تحاولش أنا الكسبان"
وفعلاً كسب
وكنت أنا الخيبان
ضحكتك العالية قدام منقبات عالكورنيش
خايفين من العين علي وشهم
نادت عالشيطان؟
ولا الأفلام الأبيحة عندي عالجهاز؟
طلع لنا منين الشيطان....
وليه إنتي مش حاسه بيه؟
ليه قدامي أنا بس ليل نهار؟!
ليست هناك تعليقات:
إرسال تعليق